Dil pe karte hain dimaagon pe asar karte hein
Ham ajab log hain zehanon main safar karte hein

Jab saraape pe kahin us ke nazar karte hein
Miir saahab kii tarah umr basar karte hein

Ba.Ndishen ham ko kisii haal gavaaraa hii nahi
Ham to vo log hain diivaar ko dar karte hein

Vaqt ki tez-kharaamii hamen kyaa rokegii
Ja.Nbish-e-kalk se sadiyon kaa safar karte hein

Naqsh-e-paa apanaa kahin raah mein hotaa hii hein
Sar se karate hain mohim jab koi sar karte hein

Ham-nashin khuub hai ye mahafil-e-yaaraan ke yahaan
Vo saliqaa hai ke aibon ko hunar karte hein

Kyaa kahen haal teraa ai mutamaddin duniyaa
Janvar bhii nahin karate jo bashar karte hein

Ham ko dushman kii bhi taqliif gavaaraa na hui
Log ehabaab se bhii sarf-e-nazar karte hein

Marqado.N pe to charaagaan hai shab-o-roz magar
Umr kuchh log a.dheron men basar karte hein

Tazakaraa miir kaa gaalib kii zabaa.N tak aayaa
Aitaraaf-e-hunar, arbaab-e-hunar karte hein

0.00 avg. rating (0% score) - 0 votes