Aankhon sey noor, dil sey khushi cheen li gai
Hum sey humaari zinda dilli cheen li gaii

Ik roz itafaaq sey hum muskuraay thay
Us ki saza main hum sey hansi cheen li gaii

Arbaab-e kum-nazar bhi hain jalwoo.N sey faiz yaab
Deeda waroo.N sey deeda wari cheen li gaii

Kitne charagh noor sey mehroom ho gay
Jab sey humaari khush nazari cheen li gaii

Shikwa mera mizaaj na matum meri sarisht
Har chand mujh sey khanda lubi cheen li gaii

Sad shukr bil-khosoos nawaza gaya mujhe
Aanso ata howe hain khushi cheen li gaii

Iqbaal is khushi ka bharosa bhi kuch na tha
Aacha howa, ye dard-e sari cheen li gaii

0.00 avg. rating (0% score) - 0 votes