Apne markaz se agar duur nikal jao ge
Khwaab ho jao ge, afsano mein dhal jao ge

Ab to chehron ke khad-o-khal bhi pehle se nahin
Kis ko maloom tha tum itne badal jao ge

Apne parcham ka kahin rang bhula mat dena
Surkh sholon se jo khelo ge to jal jao ge

De rahe hain tumhain to log rafaqat ka fareb
In ki tareekh parho ge to dahal jao ge

Apni mitti pe hi chalny ka saleeqa seekho
Sang-e-mar.Mar pe chalo ge to phisal jao ge

Khwabgahon se nikalte hue dartay kyon ho
Dhoop itni to nahin hai ke pighal jao ge

Tez qadmon se chalo aur tasadam se bacho
Bheer mein sust chalo ge to kuchal jao ge

Humsafar dhoondo na rahbar ka sahara chaho
Thokarein khao ge to khud hi sambhal jao ge

Tum ho ek zinda jawed riwayat ke chiraagh
Tum koi shaam ka suraj ho ke dhal jao ge

Subh sadiq mujhe matloob hai kis se maangun
Tum to bholay ho, charaghon se behal jao ge

0.00 avg. rating (0% score) - 0 votes