Ham se bahal rahe hain aap aap bahut ajiib hain
Dard mein dhal rahe hain aap aap bahut ajiib hain

Saayaa-e-vasl kab se hai aap kaa muntazir magar
Hijr mein dhal rahe hain aap aap bahut ajiib hain

Apane khilaaf faisalaa khud hii likhaa hai aap ne
Haath bhii mal rahe hain aap aap bahut ajiib hain

Vaqt ne aarazuu kii lau der hu_ii bujhaa bhii dii
Ab bhii pighal rahe hain aap aap bahut ajiib hain

Zahamat-e-zarbat-e-digar dost ko diijiye nahin
Gir ke sambhal rahe hain aap aap bahut ajiib hain

Daayaraavaar hii to hain ishq ke raaste tamaam
Raah badal rahe hain aap aap bahut ajiib hain

Dasht kii saarii raunaqe.N khair se ghar mein hain to kyun
Ghar se nikal rahe hain aap aap bahut ajiib hain

Apanii talaash kaa safar khatm bhii kiijiye kabhii
Khvaab mein chal rahe hain aap aap bahut ajiib hain

0.00 avg. rating (0% score) - 0 votes