Sochta hun ke usay neend bhi aati hogi
Ya meri tarha faqat ashk bahati hogi

Wo meri shakal mera naam bhulane wali
Apni tasweer se kiya aankh milati hogi

Is zameen pe bhi hai sailaab mere ashkon se
Mere maatam ki sada arsh hilaati hogi

Sham hote hi wo chokhat pe jala kar shamein
Apni palkon pe kai khuwab sulaati hogi

Us ne silwa bhi liye honge siyah rang ke libaas
Ab moharram ki tarha eid manaati hogi

Hoti hogi mere bosay ki talab mai pagal
Jab bhi zulfon mai koi phool sajaati hogi

Mere taareek zamanon se nikalne wali
Roshni tujh ko meri yaad dilaati hogi

Dil ki masoom ragein khud hi sulagti hongi
Jun hi tasweer ka kona wo jalaati hogi

Roop de kar mujhe is mai kisi shehzaade ka
Apne bachon ko kahani wo sunaati hogi

3.50 avg. rating (65% score) - 2 votes