Gaye mausam mein jo khilty they gulaboN ki tarh
Dil pe utren ge wohi khawab azabon ki trah

Rakh ke dhair pe ab raat basr krni hai
Jal chuky hein mery khaimy mery khawabon ki tarh

Saat-e-deed ke ariz hein gulabi ab tak
Awaleen lamhon ke gulnaar hijabon ki tarh

Woh samandar hai to phir roh ko shadab kary
Tishnagi kiyon mujhy deta hai sarabon ki tarh

Ghair mumkin hai tery ghar ke gulabon ka shumaar
Mery risty hoye zakhmon ke hisabon ki tarh

Yaad to hon gi woh baten tujhy ab bhi lekin
Shelf mein rakhi hoi band kitabon ki tarh

Kon jany keh naye saal mein tu kis ko parhy
Tera miyaar badalta hai nisabon ki tarh

Shokh ho jati hai ab bhi teri aankhon ki chamk
Gahy gahy tery dilchasp jwabon ki tarh

Hijr ki shab meri tanhai pe dastak de gi
Teri khushboo mery khoye hoye khawabon ki tarh

0.00 avg. rating (0% score) - 0 votes