sukoon bhi khawab hua, neend bhi he kam kam phir
qareeb aney laga doorion ka mosam phir

bana rahi he teri yad mujh ko silk e gohar
piro gai meri palkon me aj shabnam phir

wo narm lehje me kuch keh raha he phir mujh se
chira he pyar ke komal suron me maddham phir

tujhe manaun ke apni ana ki bat sunoon
ulajh raha he meray feslon ka resham phir

na us ki bat main samjhun na wo meri nazren
muamlaat e zuban ho chukey hen mubham phir

ye aney wala naya dukh bhi us ke sar hi gaya
chatakh gaya meri angushtari ka neelam phir

wo ak lamha ke jab sarey rang ak huey
kisi bahar ne dekha na aesa sangam phir

boht aziz hen aankhen meri usey, lekin
wo jatey jatey kar gaya he inhen purnam phir

5.00 avg. rating (78% score) - 1 vote